വിഴിഞ്ഞം അന്താരാഷ്ട്ര തുറമുഖത്തിന്റെ രണ്ടാംഘട്ട നിർമാണം നിലച്ചതോടെ പ്രശ്നപരിഹാരത്തിന് അടിയന്തര നീക്കവുമായി സംസ്ഥാന സർക്കാർ. പാരിസ്ഥിതിക അനുമതിയുമായി ബന്ധപ്പെട്ട തടസ്സങ്ങൾ നീക്കാൻ തുറമുഖ–പരിസ്ഥിതി വകുപ്പുകളിലെ ഉന്നത ഉദ്യോഗസ്ഥരുടെ യോഗം ഉടൻ വിളിച്ചുചേർക്കും. കേന്ദ്ര വനം–പരിസ്ഥിതി മന്ത്രാലയത്തെ വീണ്ടും സമീപിച്ച് തുടർനടപടികൾ സ്വീകരിക്കാനാണ് തീരുമാനം.
രണ്ടാംഘട്ട നിർമാണത്തിന് ആവശ്യമായ പാരിസ്ഥിതിക അനുമതി കേന്ദ്ര വനം–പരിസ്ഥിതി മന്ത്രാലയത്തിൽനിന്ന് ലഭിച്ചിട്ടില്ലെന്ന് തീരസംരക്ഷണ മാനേജ്‌മെന്റ് അതോറിറ്റി ഹൈക്കോടതിയിൽ സമർപ്പിച്ച സത്യവാങ്മൂലത്തിൽ വ്യക്തമാക്കിയിരുന്നു. ഇതിന്റെ അടിസ്ഥാനത്തിലാണ് നിർമാണ പ്രവർത്തനങ്ങൾ നിർത്തിവയ്ക്കാൻ കോടതി നിർദേശിച്ചത്. ഇതോടെ തുറമുഖ വികസനത്തിന്റെ അടുത്തഘട്ട പ്രവർത്തനങ്ങൾ പ്രതിസന്ധിയിലായി.
പ്രശ്നത്തിന് പരിഹാരം കാണാൻ കേന്ദ്ര വനം–പരിസ്ഥിതി മന്ത്രാലയത്തിന്റെ ബെംഗളൂരു യൂണിറ്റിലെ ഉദ്യോഗസ്ഥർ പുളിങ്കുടി തീരത്തെ നിർമാണ പദ്ധതി വീണ്ടും പരിശോധിക്കേണ്ടതുണ്ട്. പരിശോധനയ്ക്കുശേഷം റിപ്പോർട്ട് സമർപ്പിക്കുന്നതിലൂടെ തുടർനടപടികൾക്ക് വഴിയൊരുങ്ങുമെന്നാണ് പ്രതീക്ഷ.
വിഷയത്തിൽ അടിയന്തരമായി ഇടപെടാൻ തുറമുഖ–പരിസ്ഥിതി വകുപ്പുകൾക്ക് സർക്കാർ നിർദേശം നൽകിയിട്ടുണ്ട്. നാളെയോ മറ്റന്നാളോ വകുപ്പ് സെക്രട്ടറിമാർ യോഗം ചേർന്ന് തുടർനടപടികൾ ചർച്ച ചെയ്യും. ഇതിന് പിന്നാലെ വീണ്ടും പരിശോധന നടത്തുന്നതുൾപ്പെടെയുള്ള നടപടികൾ സ്വീകരിക്കണമെന്ന് കേന്ദ്ര മന്ത്രാലയത്തോട് ആവശ്യപ്പെടും.
അതേസമയം, ആവശ്യമായ ചർച്ചകളും നിയമോപദേശവും തേടാതെ തീരസംരക്ഷണ മാനേജ്‌മെന്റ് അതോറിറ്റി കോടതിയിൽ വിവരങ്ങൾ നൽകിയെന്ന അതൃപ്തി മുഖ്യമന്ത്രിക്കുണ്ടെന്നാണ് വിവരം. നിയമപരമായി പ്രശ്നം പരിഹരിച്ച് നിർമാണം മുന്നോട്ടുകൊണ്ടുപോകണമെന്നാണ് മുഖ്യമന്ത്രിയുടെ നിർദേശം.
വകുപ്പ് സെക്രട്ടറിമാരുടെ യോഗത്തിനുശേഷം മുഖ്യമന്ത്രിയും പരിസ്ഥിതി മന്ത്രിയും കൂടിയാലോചിച്ചായിരിക്കും കേന്ദ്ര മന്ത്രാലയത്തെ വീണ്ടും സമീപിക്കുക. കേന്ദ്രത്തിന്റെ തുടർനടപടികളും പരിശോധനാ റിപ്പോർട്ടും നിർണായകമാകുന്നതോടെ വിഴിഞ്ഞം തുറമുഖത്തിന്റെ രണ്ടാംഘട്ട നിർമാണം എപ്പോൾ പുനരാരംഭിക്കാനാകുമെന്നതിലാണ് ഇനി ശ്രദ്ധ.
